Esti día tuvi la suerte d’acompañar musicalmente la inauguración de la esposición del artista Guillermo Lourido na Galería Félix de Xixón.
Guillermo, natural de Corcubión (A Coruña), afincáu dende va años en Buyeres (Nava), ye primero de too una persona cercana, d’eses coles que la lluz surde casi ensin date cuenta. L’acordión xuntonos dende va años, anque col tiempu fuimos afayando munchos más motivos mancomún. Dacuando, charrando con él, tengo la sensación de que lo que realmente mos xune ye daqué más fondero; el ciñu y el respetu por tolo que mos arrodia no terrenal, polo que se toca, y se mira.
Cuando improviso ensín denguna obligación, gústame enforma mirar. Afitar la vista en daqué bien concreto. Na tosquedá de les sos escultures en maera, alcuentro dende va tiempu daqué sensacional, daqué que m’acompaña ya inspira dende que conocí la so obra. Nesta nueva esposición, dende un rincón de la sala, fui dexando que les melodíes surdieren pelo que vía dende la mio posición.
Atopé un cambiu abultable, nun solo na evolución natural del artista, sinón na so busca constante por sosprender, por xugar col semblante de les sos escultures y dexar al descubiertu la so esmolición creativa. Les figures, a pesar del dramatismu que les arropa, mutilaciones incluyíes, ya nun carguen con esi pesu so’l costazu, que rescamplaba en trabayos anteriores. A pesar de les torgues, son llibres y descaraes.
Ente les escultures de tolos tamaños, dexábense ver unes estraordinaries pintures que, como’l mesmu Guillermo, paecen querer pasar con desimulu ente la xente; tolo contrario. Y a to ello, amiéstase un fantásticu y orixinal trabayu en piedra qu’acaba por espertar sensaciones qu’entá nun salieren a rellucir, completando un conxuntu honestu y ensin artificios.
Too ello na Galería Félix, un espaciu afayaízu nel centru Xixón, nel que festexar la xuntanza de la enerxía de la obra espuesta, col cuidadosu trabayu de l’artesanía na enmarcación.
Allegrome fondamente’l convite pa que la mió música acompañara una vegada más al inxeniu de Guillermo d’una forma natural, ensin barreres, de la mesma forma na qu’él te dexa ver la so obra: ensin imponer una visión que condicione la tu perspectiva.
Guillermo trabaya ensin pesu so’l costazu y eso siéntese anguañu en caúna de les sos pieces.
